To av tre studentar vender tilbake etter utestenging for fusk

I perioden 2019-2023 var det over 5000 fuskesaker, det viser tal frå norske universitet og høgskular. Talet på fuskesaker har gått kraftig ned etter koronapandemien, og i desember 2024 var 365 studentar utestengde frå studiar. Totalt har 12 institusjonar delt data om kor mange studentar som vender tilbake til studiar etter utestenging. Sjølv om tala varierer, viser gjennomsnittet at 66 prosent av studentane kjem tilbake til studiar. Undersøkinga er gjennomført på oppdrag frå Kunnskapsdepartementet.

– At fleirtalet av studentar utestengde for fusk ser ut til å vende tilbake til studiar, er positivt. Saman med nedgangen i talet på utestengde studentar, viser dette at delen studentar som fell frå høgare utdanning etter å ha vore utestengde for fusk er relativt låg, seier avdelingsleiar Stig Helge Pedersen i HK-dir.

Dette er ei avgrensa kartlegging, og vi veit ikkje kva den tredjedelen som ikkje vender tilbake til studia gjer etter at perioden med utestenging er over. Delen studentar som ikkje vender tilbake til studiar kan vere lågare enn oppgitt her. Dei kan ha starta på studiar ved ein annan institusjon enn den dei blei utestengde frå, eller dei kan ha vendt tilbake på eit seinare tidspunkt.

Lite oppfølging av utestengde studentar

Undersøkinga viser at universitet og høgskular i liten grad følgjer opp studentar som blir utestengde på grunn av fusk. Berre éin institusjon har ei fast ordning for oppfølging. Dei fleste informerer studentane om rettar og moglegheiter, men har få tiltak utover dette.

Enkle grep kan sannsynlegvis hjelpe fleire tilbake til studia. Til dømes å sende ei påminning eller tilby samtalar til studentane når utestenginga nærmar seg slutten.

Om undersøkinga:

Tala byggjer på ei spørjeundersøking sendt til 33 universitet og høgskular, der 24 svarte. 12 institusjonar oppgav tal på kor mange studentar som kjem tilbake etter utestenging for fusk. Manglande oversikt skuldast hovudsakleg personvern og ressurskrevjande manuell kartlegging.