Program for Ukraina-kompetanse – Fleirårige midlar 2025

Følgjande typar organisasjonar kan søkje om midlar under denne utlysinga:

1. Institusjonar innan høgare utdanning, slik dei er lista hos NOKUT. Dette omfattar norske universitet, vitskaplege høgskular, høgskular med institusjonsakkreditering og høgskular med akkrediterte studietilbod.
2. Norske godkjende forskingsorganisasjonar, slik dei er lista hos Forskingsrådet.

Søkjarane kan knytte til seg andre relevante aktørar, som til dømes tenketankar, mediebedrifter, frivillige organisasjonar, næringsliv, fagorganisasjonar, utanlandske universitet- og forskingsinstitusjonar som partnarar. HK-dir oppmodar til samarbeid på tvers av institusjonar og fagmiljø i Noreg, i Ukraina og elles i Europa.

Program for Ukraina-kompetanse skal gjennom brei kompetansebygging i norsk næringsliv, fagmiljø, forvaltning og frivillig sektor gjere norske aktørar betre i stand til å bidra til ukrainsk motstandskraft og gjenreising. Det skal også bidra til at ukrainske erfaringar blir nyttiggjorde i det norsk samfunnet.

Programmet er finansiert av Utanriksdepartementet gjennom det norske Nansen-programmet og skal bidra å nå dei overordna måla for dette programmet. Meir informasjon om den sivile delen av Nansen-programmet.

Program for Ukraina-kompetanse skal supplere og komplettere partnarskapsprogrammet Nansen EDU som vil styrkje ukrainske høgare utdanningsinstitusjonar gjennom norsk-ukrainsk samarbeid og Forskingsrådets utlysingar til støtte for Ukraina.

Utlysinga i 2025 er på inntil 45 millionar norske kroner.

Det overordna målet er å utvikle og styrkje brei, tverrfagleg og samfunnsrelevant kompetanse om Ukraina i Noreg.

Programmet skal ha ei brei portefølje og dekkje eit spekter av relevante fagfelt med ein viss grad av balanse. Prosjekta er forventa å trekkje inn relevant kompetanse og nytte tverrfaglege tilnærmingar, så langt tenleg for resultatmåla i det einskilde prosjektet. Søkjarane må og godtgjere at prosjektet har praktisk samfunnsrelevans, at det vil bringe resultat i form av kompetanse som kan bidra til ukrainsk motstandskraft, gjenreising og integrasjon i europeiske strukturar.

Programmet skal styrkje norske samfunnsaktørar si evne og vilje til å engasjere seg i Ukraina og bidra til langsiktig ukrainsk gjenreising. Programmet er forventa å ha ein mobiliserande effekt på tvers av sektorar, inkludert privat næringsliv.

Føremålet med denne utlysinga er å finansiere prosjekt som tek sikte på å skape følgjande effektar:

1. Auka Ukraina-kompetanse i politikkutforming, forvalting og næringsliv.

Prosjekta skal:

• Styrkje kompetanse om ukrainske samfunnstilhøve, naturforhold og ressursar, forsvar, historie, kultur, språk og politikk i næringslivet, frivillig sektor, blant tilsette i stat, fylkeskommune og kommune og folkevalde.
• Auke kunnskap i norsk næringsliv om rammevilkår, marknader og investerings- og samarbeidsmoglegheiter i Ukraina.

2. Styrkt kunnskapsutvikling og tverrfaglege nettverk om Ukraina.

Prosjekta skal:

• Sørgje for utvikling, samanstilling og formidling av oppdatert og tverrfagleg kunnskap om Ukraina med relevans for ulike samfunnssektorar.
• Integrere Ukraina-relatert tematikk i høgare utdanning og fagutvikling ved norske utdanningsinstitusjonar.

Dei planlagde resultata frå prosjektet vil bli vurderte på grunnlag av evna til å skape slike effektar.

Eit prosjekt må ikkje å ha effekt på alle resultatområda for å vere relevant for programmet.

Program for Ukraina-kompetanse avgrensar ikkje kva fagområde som kan vere relevante. Det er opp til søkjaren å sannsynleggjere at prosjektmåla er i samsvar med måla for programmet og at det er både behov for den aktuelle kompetansen i det norske samfunnet og reell etterspurnad etter dei planlagde tiltaka i dei aktuelle målgruppene.

Norsk-ukrainsk samarbeid finn stad innan eit breitt sett av samfunnsområde, m.a. forsvar, militær industri, helseteknologi, energi, kommunalt samarbeid, offentleg forvalting og generelt næringslivssamarbeid. Ukrainsk kunnskap og erfaringar kan også ha stor verdi for Noreg. Eksempel på moglege tematiske felt for prosjekt kan inkludere

• Forretningsverksemd i Ukraina (marknader, investeringar, industriutvikling)
• Ukrainske reformar, styringsstrukturar og institusjonar
• Energisystem, naturressursar og grøn omstilling
• Ukrainsk språk, kultur, politikk, samfunnsutvikling og historie
• Tryggleik, beredskap og sivilforsvar

De kan søkje om inntil NOK 3 000 000,- (tre millionar norske kroner) i tilskot per prosjekt. Minimum søknadssum er NOK 800 000 (åtte hundre tusen norske kroner).

Prosjekta kan vare inntil 25 månader. Prosjekta kan tidlegast starte 1. desember 2025 og må vere planlagt avslutta innan 31. desember 2027.

Utanriksdepartementet har førebels sett av NOK 15 millionar til programmet i 2025 og NOK 30 millionar i 2026 for Program for Ukraina-kompetanse under Nansen-programmet.

Krav om eigenandel

Eigenandel i denne utlysinga er ikkje spesifisert, men søkjar må rekne med ein viss eigenfinansiering for å gjennomføre planlagde aktivitetar.

Kva kan midlane nyttast til?

Prosjektstøtte i Program for Ukraina-kompetanse kan dekkje eit breitt sett av tiltak som vil bidra til å nå måla for ordninga.

Desse omfattar, men er ikkje avgrensa til:

1. Utvikling og gjennomføring av formaliserte etter- og vidareutdanningstilbod for relevant norsk Ukraina-kompetanse

• Tilbod retta mot særlege målgrupper og samarbeidspartnarar
• Opne tilbod

2. Styrkje Ukraina-relevans ved eksisterande studietilbod

• Kan omfatte t.d. studentstipend for masteroppgåver, og reisestipend, kontorplassar for masterstudentar (ved forskingsinstitutt, private verksemder, forvaltningsorgan etc. (merk eigne satsar), reisestøtte (på alle studienivå),kompetansebygging for tilsette, utvikle og implementere kurstilbod. 

3. Forskingsformidling og nettverk

• Policynotat, artiklar, populærvitskaplege bøker, kronikkar, fysiske møte, digitale møteseriar, podkastar, undervisningsopplegg, digitale fagressursar retta mot utdanning og formidling.
• Korte kurs mot spissa faggrupper, næringsliv, forvaltning og folkevalde.
• Møteplassar mellom forskingsmiljø, næringsliv, forvaltning og frivillig sektor.

Alle kurs, studiemateriell og liknande må vere tekne i bruk innan utgangen av prosjektperioden.

Midlane de søkjer om frå HK-dir kan brukast til å dekkje følgjande typar kostnader:

• Personal- og administrasjonskostnader
• Innkjøpskostnader for tenester
• Innkjøpskostnader for utstyr
• Stipendkostnader
• Reise- og opphaldskostnader
• Andre prosjektrelaterte kostnader 

Les meir om kva dei ulike kostnadstypane omfattar og korleis du skal rekne dei ut og budsjettere.

HK-dirs vilkår for prosjekttilskot gjeld for gjennomføringa av prosjekta som får tilskot. Her finn du ei nærare rettleiing til korleis HK-dir følgjer opp og kontrollerer prosjekta som blir støtta.

Nedanfor finn du informasjon om kva minimumskrav som gjeld for denne utlysinga og kva kriterium søknadene vil bli vurderte ut frå.

I søknadsskjemaet og malen for prosjektomtale er det hjelpetekstar som rettleiar om kva slags informasjon HK-dir etterspør i dei ulike felta.

Søknaden må oppfylle følgjande minimumskrav:

• Søknaden må vere levert innan søknadsfristen som gjeld for utlysinga. 
• Søknaden må vere levert gjennom HK-dirs søknadsportal Espresso.
• Søknaden må være skriven på norsk (bokmål eller nynorsk).
• Søknaden må vere levert på vegne av ein organisasjon som kan stå som søkjar under denne utlysinga. 
• Søknaden må oppfylle krava om varigheit og eigenandel som gjeld for utlysninga.
• Søknaden må ha vedlagt ein prosjektomtale i pdf-format, utforma i vår mal på bokmål eller på nynorsk.
• Søknaden må ha vedlagt ein signert versjon av vår deltakingserklæring frå den personen hos søkjaren som er juridisk ansvarleg for søknaden.
• Søknaden må ha vedlagt ein cv for prosjektleiar (maks 4 sider).

Søknader som ikkje oppfyller desse krava kan bli avviste eller vurderte som mangelfulle. For søknader med feil vil HK-dir gje ein kort tilleggsfrist for å rette feilen der det er mogleg. Innhald i vedlegg/lenkjer som det ikkje er stilt krav om, vil ikkje bli tekne med i vurderinga av søknaden.

Treng du rettleiing undervegs? Vi kan svare på spørsmål om utlysinga, men kan ikkje lese gjennom eller kommentere på konkrete søknadsutkast. Vi kan rettleie på e-post, telefon, i videomøte eller andlet-til-andlet. Ta gjerne kontakt med den ansvarlege for utlysinga i HK-dir.

Søkjarwebinar

Vi inviterer til søkjarwebinar måndag 25. august kl. 14.00. Vi vil orientere om utlysinga og krav til søknaden.

Opptak blir delt på arrangementssida for webinaret.

Søknadene vil bli vurderte av to personar tilknytt HK-dir med relevant kjennskap til området utlysinga gjeld for. Kvar evaluator gjev søknadene ein delkarakter for kvart vurderingskriterium som gjeld for utlysinga, i samsvar med HK-dirs karakterskala. Vurderingane blir så konsoliderte, slik at kvar søknad får eitt sett med karakterar. Dersom det er usemje om karaktersettinga, vil søknaden også bli vurdert av ein tredje person.

For å kvalifisere for tilskot må alle dei endelege delkarakterane vere 3 eller høgare, og minst tre av fire delkarakterar vere 4 eller høgare.

Totalkarakter blir så kalkulert på grunnlag av dei endelege delkarakterane og vektinga som er oppgjeven for kriteria (vekta snittkarakter). Der to eller fleire søknader får same totalkarakter, vil søknadene bli rangerte ut frå høgaste delkarakter på prosjektrelevans. Er denne framleis lik, vil dei andre delkarakterane bli vurderte i den rekkefølgja dei er oppgjevne over, til det er ein skilnad. Viss alle delkarakterar er like, blir rekkefølgja avgjord ved loddtrekking.

I tråd med ordningsregelverket for Nansen-programmet kan HK-dir ta omsyn til porteføljesamansetting ved tildelinga. Dette omfattar både å la vere å støtte eitt eller fleire prosjekt der prosjektets føremål er vurdert dekt av eit anna og høgare rangert prosjekt, og å sikre at den endelege porteføljen har ein viss tematisk breidde.

HK-dir fattar endeleg vedtak om tilskot basert på den endelege rangeringa av søknadene.

Søknader som oppfyller krava som gjeld for utlysninga, vil bli vurderte ut frå følgjande kriterium:

Prosjektrelevans (30%)

Under dette kriteriet vil evaluator vurdere følgjande element:

• I kva grad behovet for prosjektet og betydninga for målgruppa(-ene) er tydeleg demonstrert.
• I kva grad dei planlagde resultata frå prosjektet er konkrete og eigna til å nå måla for utlysinga.
• Ambisjonsnivået for prosjektresultata.
• I kva grad prosjektet er nyskapande og/eller komplementært til andre tidlegare eller pågåande tiltak/aktivitetar hos institusjonane/aktørane som deltek. 
• I kva grad prosjektet syner kjennskap til eksisterande tilbod frå andre aktørar, og korleis prosjektet vil bringe ein tilleggsverdi til det som alt eksisterer.

Kvalitet på prosjektutforming og gjennomføring (20%)

Under dette kriteriet vil evaluator vurdere følgjande element:

• I kva grad prosjektet har ein konkret, heilskapleg og realistisk gjennomføringsplan.
• Omfang og kvalitet på risikovurderingar.
• I kva grad prosjektet er kostnadseffektivt og har allokert tilstrekkelege ressursar til å gjennomføre aktivitetane.
• Prosjektet si evne til å ta omsyn til behov og interesser hos målgruppene.
• I kva grad prosjektet har ein konkret, heilskapleg og realistisk plan for å nå ut til målgruppa med formidling undervegs i prosjektet.

Kvalitet på prosjektgruppa og samarbeidsstrukturar (20%)

Under dette kriteriet vil evaluator vurdere følgjande element:

• Samla erfaring og ekspertise i prosjektgruppa og i kva grad institusjonane/aktørane som deltek kompletterer kvarandre.
• I kva grad fordelinga av oppgåver og ansvar syner aktive bidrag og forplikting frå samtlege institusjonar/aktørar som deltek.
• I kva grad prosjektet har ein klar og heilskapleg plan for samhandling mellom institusjonane/aktørane som deltek og evt. andre interessentar.

Prosjekteffektar (30%)

Under dette kriteriet vil evaluator vurdere følgjande element:

• Potensiell effekt for målgrupper, institusjonane som deltek og aktørar i og utanfor prosjektet.
• Kvaliteten på tiltak som skal sikre at effektane blir oppretthaldne etter avslutta prosjektperiode.
• Kvaliteten på planlagde tiltak for å evaluere og dokumentere effektar av prosjektet.

Kriteria vil bli vekta i samsvar med prosentandelen som er oppgjeven i parentes bak kvart kriterium. Her finn du ei nærare rettleiing om korleis desse kriteria vil bli nytta i søknadsvurderinga.

Alle søkjarar vil bli informerte om utfallet av søknadsprosessen. HK-dir reknar med å kunne sende ut vedtak om tilskot i slutten av november 2025. Ei grunngjeving for karaktersettinga vil følgje som vedlegg til vedtaka.