Program for Ukraina-kompetanse – Eittårige midlar 2026

Alle verksemder som er registrerte i Einingsregisteret kan søkje om tilskot under denne utlysinga.

Søkjarane kan knytte til seg andre relevante samarbeidsaktørar der det er aktuelt.

Utlysinga skal gjennom prosjektstøtte støtte opp om dei overordna måla for det norske Nansen-programmet. Sjå meir nederst på sida.

Utlysinga skal finansiere prosjekt som støttar opplysnings- og informasjonstiltak om Ukraina, og gjer norske aktørar betre skikka til å inngå samarbeid med aktørar i Ukraina.

Utlysinga tek sikte på å skape følgjande effektar:

1: Auka kunnskap om Ukraina i det norske samfunnet. 

Prosjekta skal

• Styrkje interesse for og kunnskap om samfunnstilhøva i Ukraina blant folk i Noreg 
• Bidra til eit meir informert offentleg ordskifte om Ukraina i Noreg

2: Norske aktørar er betre rusta til samarbeid med aktørar i Ukraina. 

Prosjekta skal

• Styrkje norske aktørars kunnskap knytt til samhandling med aktørar i Ukraina
• Legge til rette for kontakt og samhandling mellom aktørar i Noreg og i Ukraina.

Eit prosjekt må ikkje ha effekt på begge resultatområda for å vere relevant for programmet.

Dei planlagde resultata frå prosjektet vil bli vurderte på grunnlag av evna til å skape slike effektar, jf. vurderingskriteria nedanfor.

De kan søkje om mellom NOK 30 000 og NOK 200 000 i tilskot per prosjekt. 

Prosjekta kan vare inntil 12 månader. Dei kan tidlegast starte 1. januar 2027 og må vere planlagde avslutta innan 31. desember 2027.

Kva kan midlane nyttast til?

Tilskotet frå HK-dir kan brukast til å dekkje følgjande typar kostnader:

• Produksjonskostnader (informasjonsmateriell, bøker, filmar, podkastar, digitale ressursar og liknande)
• Arrangementskostnader (kurs, føredrag, seminar, utstillingar, debattar og andre opne formidlingstiltak)
• Reise- og opphaldskostnader
• Innkjøpskostnader for utstyr opp til 10% av beløpet det er søkt om
• Andre prosjektrelaterte kostnader som er nødvendige for å oppnå relevante resultat

Tilskotet kan ikkje nyttast til å dekkje ordinære driftskostnader. Lønns- og honorarkostnader kan dekkjast, føresett at dei er moderate og direkte knytte til nødvendig arbeid med planlegging, gjennomføring og oppfølging av prosjektet. Slike kostnader skal førast under relevant budsjettkategori (produksjonskostnader, arrangementskostnader eller andre prosjektrelaterte kostnader).

Budsjetta i innvilga søknader kan bli reduserte etter skjønn dersom kostnader framstår unødvendige eller urimelege.

HK-dirs vilkår for prosjekttilskot gjeld for gjennomføringa av prosjekta som får tilskot.

Nedanfor finn du informasjon om kva minimumskrav som gjeld for denne utlysinga og kva kriterium søknadene vil bli vurderte ut frå.

Du må levere søknaden gjennom HK-dirs søknadsportal Espresso.

I søknadsskjemaet og malen for prosjektomtale er det hjelpetekstar som rettleiar om kva slags informasjon HK-dir etterspør i dei ulike felta.

Søknaden må oppfylle følgjande minimumskrav:

• Søknaden må vere levert innan søknadsfristen som gjeld for utlysinga.
• Søknaden må vere levert gjennom HK-dirs søknadsportal (Espresso).
• Søknaden må være skriven på norsk (bokmål eller nynorsk).
• Søknaden må vere levert på vegner av ein aktør som kan stå som søkjar under denne utlysinga.
• Søknaden må oppfylle krava om varigheit og tilskotsbeløp som gjeld for utlysinga.

Søknader som ikkje oppfyller desse krava kan bli avviste eller vurderte som mangelfulle. For søknader med feil vil HK-dir gje ein kort tilleggsfrist for å rette feilen der det er mogleg. Innhald i vedlegg/lenkjer som det ikkje er stilt krav om, vil ikkje bli teke med i vurderinga av søknaden.

Treng du rettleiing undervegs? Vi kan svare på spørsmål om utlysinga, men kan ikkje lese gjennom eller kommentere på konkrete søknadsutkast. Vi kan rettleie på e-post, telefon, i videomøte eller andlet-til-andlet. Ta gjerne kontakt med den ansvarlege for utlysinga i HK-dir.

HK-dir vil vurdere søknadane og kontrollere om dei oppfyller dei formelle krava.

Søknader som oppfyller krava som gjeld for utlysinga, vil bli vurderte ut frå følgjande kriterium:

• I kva grad dei planlagde resultata er konkrete og eigna til å oppnå måla for utlysinga (Relevans)
• I kva grad prosjektet har ein konkret, heilskapleg og realistisk gjennomføringsplan (Gjennomføring)
• Resultata si forventa rekkevidde og verdi for ulike grupper/aktørar i samfunnet (Effekt)

For kvart kriterium blir det sett ein delkarakter i samsvar med HK-dirs karakterskala (1-7).

For å kvalifisere for tilskot må alle dei endelege delkarakterane vere 3 eller høgare, og minst to av tre delkarakterar vere 4 eller høgare.

Der to eller fleire søknader får same totalkarakter, vil søknadene bli rangerte ut frå høgaste delkarakter på prosjektrelevans. Er denne framleis lik, vil dei andre delkarakterane bli vurderte i den rekkefølgja dei er oppgjevne over, til det er ein skilnad. Viss alle delkarakterar er like, blir rekkefølgja avgjord ved loddtrekking.

HK-dir fattar vedtak om tilskot basert på den endelege rangeringa av søknadene.

I tråd med ordningsregelverket for Nansen-programmet kan HK-dir ta omsyn til portefølje-samansetting ved tildelinga. Det inneber både å ikkje støtte prosjekt der føremålet er vurdert dekt av eit høgare rangert prosjekt, og å sikre ei viss tematisk og organisatorisk breidde i porteføljen.

Same søkjar kan maksimalt få innvilga to prosjektsøknader.

Alle søkjarar vil bli informerte om utfallet av søknadsprosessen. HK-dir reknar med å kunne sende ut vedtak om tilskot i slutten av oktober. Ei grunngjeving for karaktersettinga vil følgje som vedlegg til vedtaka.

Meir om Program for Ukraina-kompetanse

Program for Ukraina-kompetanse skal gjennom brei kompetansebygging i norsk næringsliv, fagmiljø, forvaltning og frivillig sektor gjere norske aktørar betre i stand til å bidra til ukrainsk motstandskraft og gjenreising. Det skal også bidra til at ukrainske erfaringar blir nyttiggjorde i det norsk samfunnet.

Programmet er finansiert av Utanriksdepartementet gjennom det norske Nansen-programmet for Ukraina og skal bidra å nå dei overordna måla for dette programmet:

• Ukraina kan sjølv bestemme over eiga framtid
• Statsfinansiell stabilitet og kritiske samfunnsfunksjonar er oppretthaldne
• Styresett er forbetra, i tråd med krava frå EU til kandidatland
• Liv er redda, naud er lindra og menneskeverd er ivareteke
• Menneske i naud har fått naudsynt vern og assistanse i tråd med dei humanitære prinsippa

Meir informasjon om den sivile delen av Nansen-programmet.