Utgreiing om modellar for stipendordningar for internasjonale studentar frå utanfor EØS og Sveits

Hausten 2023 vart det innført studieavgift for internasjonale studentar frå utanfor EU/EØS og Sveits ved norske institusjonar. I samband med dette fekk HK-dir i oppdrag frå Kunnskapsdepartementet å greia ut mogelege modellar for stipendordningar for internasjonale studentar frå land utanfor EØS og Sveits.

Første del av oppdraget gjekk ut på å kartlegga nordiske tilnærmingar og skissera overordna modellar for stipendordningar tilpassa det høgare utdanningssystemet i Noreg. Utgreiinga som svarer på første del vart levert som eit notat til KD 19.juni 2023.

Samandrag av notatet

Vi har kartlagt erfaringar med stipendordningar for den aktuelle studentmålgruppa i Danmark, Sverige og Finland. Kartlegginga visar at alle tre land har fleire stipendordningar, og hovudordninga i alle tre land gir stor autonomi til institusjonane. Innføringa av studieavgifter har ikkje stoppa straumen av internasjonale studentar frå land utanfor EØS og Sveits til høgare utdanning i dei nordiske landa. Det er grunn til å tru at stipendordningar motverkar tapet av studentar frå tredjeland. Målsettingar, innretningar og storleik avgjer i kva grad og på kva måte.

I notatet presenterer vi fem sentrale trekk som er relevante å ta omsyn til ved utforming av stipendmodellar:

• fordeling
• sentralisering
• føringar
• ytingsnivå
• omfang

Med utgangspunkt i desse trekka skisserte vi to mogelege tilnærmingar til stipendmodellar. Desse to modellane utelukkar ikkje kvarandre. Kva mål ei stipendordning skal bidra til å nå vil ha mykje å seia for korleis modellane vert utforma. Signala frå sektoren viser at fleksibilitet og autonomi er viktig. Sektoren ønskjer også at måla for stipendordningar vert tydelege.

I arbeidet vart sektoren trekt inn i så stor grad som råd innanfor dei aktuelle tidsrammene. Dersom du ønskjer å lesa notatet finn du dette her:

Dersom du ønskjer å lesa oppdragsbrevet finn du det på regjeringen.no -"Supplerende tildelingsbrev nr. 6 2023" (PDF).