Samarbeidspartnarskap i Erasmus+ støttar utdanningssamarbeid i Europa som bidreg til å utvikle, utveksle og prøve ut nyskapande praksis, pedagogisk metode og/eller ulike læringsaktivitetar.
Kven kan søke
Alle typar organisasjonar og utdanningsinstitusjonar som har vore etablert i minst to år, kan søke som koordinator, så framt effekten ligg i ein eller fleire av følgande sektorar:
- barnehage og skule
- fag- og yrkesopplæring (inkludert fagskular)
- vaksne si læring
- høgare utdanning
Som hovudregel skal eit samarbeidspartnarskap bestå av minst tre partnarar frå tre av Erasmus+-landa (dei 27 EU-landa samt Norge, Island, Liechtenstein, Nord-Makedonia, Serbia, Tyrkia, Sveits og Storbritannia).
Land utanfor EU/EØS kan berre inkluderast som partnarar dersom dei er frå land i region 1 til 3 (sjå Programguide del A om "Kvalifiserte land"), og berre dersom dei tilfører prosjektet stor meirverdi. Ein kan ikkje inkludera partnarar frå Belarus.
Ver merksam på at kvar institusjon som søker innanfor sektorane barnehage og skule, fag- og yrkesopplæring eller vaksne si læring berre kan vere involvert i maks. ti søknader (som koordinator eller partnar) per utlysingsår.

Søknadsfrist
9. mars 2027 kl. 12.00 (CET)
Om tilskotet
Tilskotsbeløp
Ein søker om eitt av tre ulike sekkebeløp: 120 000 euro, 250 000 euro eller 400 000 euro. For meir utfyllande informasjon om moglegheiter innanfor tiltaket og krav til søknaden, les kapittelet i programguiden om Cooperation partnerships.
Sjå også handbok for sekkebeløp Handboka for 2027 vert publisert her så snart ho er tilgjengeleg.
Slik søker du
For å få tilgang til søknadsskjemaet, treng du ein EU Login-brukarkonto. Denne opprettar du sjølv på ein enkel måte (europa.eu).
I Erasmusportalen finn du søknadsskjemaet for samarbeidspartnarskap (KA220 – Cooperation partnerships) innanfor dei respektive sektorar under menypunktet «Opportunities». Søknaden er eit online-skjema og blir lagra automatisk når du jobbar i det. Du kan også gi tilgang til andre som kan redigere søknaden.
Organisasjons-ID (OID)
Alle utdanningsinstitusjonar og organisasjonar som søker om Erasmus+-midlar må skaffe seg ein organisasjons-ID (OID). Når du oppgir organisasjons-ID i søknaden, blir relevant informasjon om organisasjonen automatisk fylt ut i søknadsskjemaet. Du kan finne ut om din organisasjon har eit OID-nummer frå før, eller registrere institusjonen din i Erasmusportalen under menypunktet «Organisations».
Sørg for at søknaden inneheld tilstrekkeleg informasjon
Det er viktig at søknaden inneheld tilstrekkeleg, relevant og tydeleg strukturert informasjon. Uklare, mangelfulle eller lite relevante svar kan gi lågare poengsum. Eventuelle vedlegg skal støtte søknaden og skal ikkje brukast til å erstatte eller utdjupe svara i søknadsskjemaet.
Ver tidleg ute med søknaden!
Det er lurt å sende inn søknaden nokre dagar før fristen. Då har vi tid til å hjelpe deg om det skulle oppstå tekniske problem. Viss du får problem med å sende inn søknaden, ber vi om at du tar kontakt med oss på e-post: erasmuspluss@hkdir.no (ADU, SCH, VET) / erasmus@hkdir.no (høgare utdanning). Får du problem same dagen som søknadsfristen, må du kontakte oss umiddelbart.
Nyttig informasjon for deg som søker
- HK-dir har utarbeidd eit søknadsskjema med rettleiing til korleis fylle ut søknaden. Ver obs på at denne er frå 2026 utlysninga. Ei oppdatert rettleiing for 2027 vil bli publisert så snart søknadsskjemaet for 2027 er klart.
- HK-dir har laga ressurssider for dei som har pågåande Samarbeidsprosjekt. Her finn du informasjon og rettleiing som òg kan vere nyttig når du skal utforme ein søknad.
- På Erasmus+ Project Results Platform finn du ei oversikt over alle tildelte Erasmus+ prosjekt, inkludert Samarbeidsprosjekt (KA220). Her kan du hente inspirasjon og sjå kva som allereie er gjort på området du ønskjer å arbeide med.
- Lag ein god plan for korleis de skal kommunisere om prosjektet og spreie resultata. EU-kommisjonen si rettleiing How to communicate your project gir nyttige tips. De kan òg bruke Impact Tool, eit praktisk verktøy utvikla av det nederlandske nasjonalkontoret for Erasmus+.
- For høgare utdanningsinstitusjonar: Sjå HK-dirs rettleiing og sjekkliste for kva du bør hugse på når du utviklar eit Erasmus+ prosjektsamarbeid i høgare utdanning.
- For skule og barnehage, fag- og yrkesopplæring og vaksne si læring: HK-dir har utvikla eigne ressurssider for desse sektorane. Her finn du samla informasjon om kven som kan søkje, korleis du kjem i gang, og kva moglegheiter Erasmus+ gir. Sjå ressurssidene for skule og barnehage, fag- og yrkesopplæring og vaksne si læring.
Slik behandlar vi søknaden
- Gyldigheitssjekk: HK-dir sjekkar først at søknaden oppfyller alle formelle kriterium.
- Sjekk av originalt innhald: Alle prosjektsøknader må innehalda originalt innhald skrive av søkjaren sjølv, eller i samarbeid med partnarar. Sjå Programguiden del C, informasjon til søkarar.
- Sjekk av operasjonell kapasitet: HK-dir gjennomfører ein kontroll for å vurdere om det er sannsynleg at søkarorganisasjonen har den nødvendige kapasiteten som trengs for å gjennomføre prosjektet den søker på. Du kan lese meir om det her.
- Kvalitetsevaluering: Søknaden vert vurdert av uavhengige ekspertar etter fastsette kriterium. Du finn vurderingskriteria i programguiden for Erasmus+. Du kan òg lese meir om korleis ekspertane vurderer søknadene i Guide for experts on quality assessment. Rettleiinga for 2027 vert publisert her så snart ho er tilgjengeleg.