Taxisjåfør - grunnleggjande ferdigheiter på jobb

Last ned som PDF, Excel eller Word

Arbeidsoppgåver for taxisjåfør

• Sørgje for å frakte passasjerar til rett destinasjon.
• Køyre trafikksikkert.
• Halde seg sjølv og andre trygge.
• Hjelpe passasjerane med bagasje.
• Forsikre seg om at taxien er i forskriftsmessig teknisk stand og sørgje for nødvendig service.
• Sørgje for at bilen er rein og ryddig til ei kvar tid.
• Utføre taxiyrket på ein profesjonell måte.

Det vil vere ein del ulikskapar mellom arbeidsoppgåvene til taxisjåførar i byen og på landet.

Leseferdigheiter

Kvar dag vil taxisjåføren

• lese skilt og instruksar i trafikken.
• oppdatere seg på køyretilhøva.
• lese informasjon om passasjerar og bestillingar.
• lese meldingar eller loggar frå taxisentralen.
• lese bestillingar og meldingar på taksameteret.
• lese bestillingar og meldingar via ulike appar.

Med jamne mellomrom vil taxisjåføren

• lese informasjon om nye rutinar.
• lese avviksmeldingar.
• lese ruteforklaringar i kart eller GPS.
• lese meldingar om feil på taksameteret.
• lese skiftplanar.
• lese e-postar og meldingar.

Av og til vil taxisjåføren

• finne fram til aktuell informasjon i sjåførhandboka.
• kjenne til lover, forskrifter, avtalar og dokument som gjeld for taxi.
• lese opplæringsmateriell.
• lese og setje seg inn i nye rutinar.
• slå opp i tekniske handbøker.
• lese tryggleiksinformasjon og rutinar for å køyre trygt.
• lese informasjon og skjema som gjeld sitt eige arbeidsforhold.
• lese køyre- og kviletidsføresegnene.
• kunne lese identitetsmerking hos personar med alvorlege sjukdomar.
• kjenne til uniformsreglementet.

Skriveferdigheiter

Kvar dag vil taxisjåføren

• registrere passasjerar og bestillingar.
• gjere klart oppgjeret for dagen.
• melde seg ledig eller oppteken og godkjenne bestillingar på taksameteret.
• loggføre sitt eige skift.

Med jamne mellomrom vil taxisjåføren

• loggføre tekniske problem og avvik.
• rapportere hendingar til overordna.
• skrive meldingar om feil og manglar til andre sjåførar eller skiftleiinga.
• skrive e-postar og meldingar.

Av og til vil taxisjåføren

• rapportere og dokumentere hendingar ved uhell, ran eller trugande situasjonar.
• rapportere og dokumentere skadar på materiell eller menneske.
• rapportere og dokumentere hærverk og tjuveri.
• vidareformidle klager frå passasjerar.
• rapportere om feilmeldingar frå taksameteret til løyvehavaren/taxisentralen.
• skrive avviksmeldingar.
• skrive notat og oppgåvesvar i samband med opplæring.
• fylle ut ulike skjema som gjeld sitt eige arbeidsforhold.

Munnlege ferdigheiter

Kvar dag vil taxisjåføren

• helse på passasjerar på ein hyggjeleg måte.
• be om å få sjå reisedokumentasjon eller ta imot betaling.
• kommunisere med passasjerane om kvar dei skal.
• hjelpe passasjerar inn og ut av bilen på ein høfleg måte.
• kommunisere formelt med andre sjåførar.
• forstå kor viktig det er å yte service og kjenne godt til ulike kommunikasjonssituasjonar.
• rapportere munnleg om hendingar i sitt eige skift.
• delta i uformelle samtalar med passasjerar og kollegaer.

Med jamne mellomrom vil taxisjåføren

• melde frå om problem under køyring og be om hjelp.
• løyse problem med passasjerar.
• handtere uventa situasjonar.
• handtere kritikk på ein konstruktiv måte.
• svare på spesielle førespurnader.
• ta imot munnlege beskjedar og instruksar.
• kjenne til god behandling av passasjerar med særskilde behov.
• informere passasjerar om fordelane ved å bruke selskapet sine appar.

Av og til vil taxisjåføren

• kommunisere med overordna dersom det trengst for informasjon eller assistanse.
• kommunisere med ansvarlege ved sjukdom og dødsfall.
• vite korleis ein handterer ruspåverka, trugande og valdelege passasjerar.
• handtere nødssituasjonar.
• kjenne til og kunne formidle kunden sin rett til å klage på transporten og framgangsmåten for dette.
• høyre på opplæring i nye rutinar og regelverk.
• samarbeide og snakke med andre som deltek i opplæring.
• delta i HMS-opplæring.
• delta i møte og kome med innspel.
• ha ein medarbeidarsamtale med leiaren sin.
• varsle om hendingar eller ulukker.

Rekneferdigheiter

Kvar dag vil taxisjåføren

• kjenne til betalingsformer og oppgjersformer.
• kontrollere betaling og gje rette vekslepengar.
• ta oppgjer og kontrollere kontantbehaldninga mot kredittsal.
• rekne ut rabattar.
• lese av og vurdere numerisk informasjon frå instrument på dashbordet.
• rekne ut drivstoffbruket i høve til køyremønsteret.
• kunne planleggje og velje køyrerute ut frå vegstandarden og miljømessige konsekvensar.
• ta omsyn til at kunden vil reise på billegaste vis.

Med jamne mellomrom vil taxisjåføren

• kontrollere sin eigen lønsslipp.
• loggføre si eiga køyring.
• vurdere kor lang tid køyreoppdrag tek.
• sjekke lufttrykket i dekka og fylle rett mengd luft.
• måle mønsterdjupna og vurdere om ho er god nok.
• lese og finne fram i kart, GPS eller vegbok.
• vurdere høgda og lengda på køyretøyet for å køyre trygt.

Av og til vil taxisjåføren

• vurdere om talet på passasjerar er høgare enn lova tillèt.
• lese og vurdere numerisk informasjon i høve til tekniske spesifikasjonar.
• vurdere oppdrag og vidare køyring ut frå køyre- og kviletidsføresegnene.
• kjenne til dei kostnadene som ligg til grunn for drift av taxiløyve.
• kjenne til dei marknadsmessige og økonomiske vilkåra som gjeld for taxitransport.
• bruke kart eller GPS for å rekne ut avstandar og finne dei beste rutene.

Digitale ferdigheiter

Kvar dag vil taxisjåføren

• lese av taksameteret.
• loggføre sitt eige skift.
• ta oppgjer for sitt eige skift etter at han er ferdig for dagen.
• bruke GPS til å finne fram.
• bruke mobiltelefon.

Med jamne mellomrom vil taxisjåføren

• levere rekneskap.
• bruke sentralen sin app for bestillingar.
• føre timelister.
• sende tekstmeldingar til kollegaer eller overordna.
• halde seg oppdatert på aktuelle arrangement via internett.
• skrive logg for bruk av verkstaden.
• bruke smarttelefon og nettbrett med forskjellige appar knytte til oppgåver.
• sende e-postar med vedlegg.

Av og til vil taxisjåføren

• loggføre hendingar via meldingar.
• dokumentere avvik og ulukker via meldingar.
• ta bilete for å dokumentere uhell og liknande.
• finne fram til HMS-regelverk på internett.
• sende og fylle ut kontraktar.
• hjelpe kundar med betalingstenester.
• bruke ulike ressursar for opplæring og sertifisering.
• oppdatere seg på ISO-godkjenningar og EU-/EØS-krav.
• lese opplæringsmateriell og e-læringsprogram.
• finne fram til og lese nettsidene til sentralen for å halde seg oppdatert.
• bruke sosiale medium for å halde seg oppdatert og reklamere for si eiga verksemd.
• bruke ulike digitale møteplassar for samarbeid og kommunikasjon.
• bruke standard kontorprogramvare.
• bruke QR- og strekkodar når det trengst.